"ವಿಶ್ವದೆಲ್ಲೆಡೆ ವ್ಯಾಪಕವಾಗಿ ಹರಡುತ್ತಿರುವ ಯೋಗ"

ಭಾರತೀಯ ಸಂಸ್ಕೃತಿಯಲ್ಲಿ ಸಾವಿರಾರು ವರ್ಷಗಳಿಂದ ಯೋಗವನ್ನು ಅಭ್ಯಾಸ ಮಾಡಿಕೊಂಡು ಬರಲಾಗುತ್ತಿದೆ,ಆದಿಯೋಗಿ ಎಂದೇ ಕರೆಯಲ್ಪಡುವ ಶಿವನು ಸಪ್ತರ್ಷಿಗಳಿಗೆ ಯೋಗದ ಕುರಿತಾದ ಶ್ರೇಷ್ಠ ಬೋಧನೆಗಳನ್ನು ಮಾಡುತ್ತಾನೆ ಹಾಗೂ ಅದನ್ನು ಕಲಿತ ಸಪ್ತರ್ಷಿಗಳು ಇತರರಿಗೆ ಯೋಗ ವಿದ್ಯೆಯ ವಿಚಾರಧಾರೆ ಎರೆಯುತ್ತಾರೆ, ಹೀಗೆ ಶಿವನಿಂದ ಶುರುವಾದ ಯೋಗವು ಋಷಿ ಮುನಿಗಳ ಮೂಲಕ ಅಸಂಖ್ಯಾತ ಯೋಗ ಪಟುಗಳನ್ನು ತಲುಪುತ್ತದೆ, ವಿಶ್ವಕ್ಕೆ ಭಾರತ ನೀಡಿರುವ ಅಮೂಲ್ಯಾಗ್ರ ಕೊಡುಗೆಗಳಲ್ಲಿ ಯೋಗವು ಸಹ ಒಂದು, ಯೋಗದಿಂದ ಉಂಟಾಗುವ ಸತ್ಪರಿಣಾಮಗಳನ್ನು ಅರಿತ ವಿದೇಶಿಯರು ಯೋಗದೆಡೆಗೆ ಸೆಳೆಯಲ್ಪಟ್ಟರು, ಭಾರತದಲ್ಲಿ ಯೋಗ ಕಲಿತ ಹಲವಾರು ಯೋಗ ಸಾಧಕರು ವಿದೇಶಗಳಿಗೆ ತೆರಳಿ ಯೋಗವನ್ನು ಪ್ರಸರಿಸಿ ವಿದೇಶಿಯರ ಮೆಚ್ಚುಗೆಗೆ ಪಾತ್ರವಾಗುತ್ತಾರೆ, ಭಾರತ ಸ್ವಾತಂತ್ರ್ಯ ಪಡೆದ ೫೮ ವರ್ಷಗಳ ತರುವಾಯ ವಿಶ್ವದೆಲ್ಲೆಡೆ ಜೂನ್ ೨೧ ರಂದು ಅಂತರರಾಷ್ಟೀಯ ಯೋಗ ದಿನವನ್ನು ಸಂಭ್ರಮದಿಂದ ಆಚರಿಸಲಾಗುತ್ತದೆ, ನರೇಂದ್ರ ಮೋದಿ ನೇತೃತ್ವದ ಕೇಂದ್ರ ಸರ್ಕಾರ ೨೦೧೪ ರ ಸೆಪ್ಟೆಂಬರ್ ನಲ್ಲಿ ಈ ಕುರಿತಾದ ಪ್ರಸ್ತಾವನೆಯನ್ನು ಯುನೈಟೆಡ್ ನೇಷನ್ಸ್ ನ ಸಭೆಯಲ್ಲಿ ಮಂಡನೆ ಮಾಡುತ್ತದೆ, ವಿಶ್ವದ ೧೭೦ ಕ್ಕೂ ಹೆಚ್ಚು ರಾಷ್ಟ್ರಗಳು ಇದಕ್ಕೆ ಸಮ್ಮತಿಯನ್ನು ಸೂಚಿಸುವ ಮೂಲಕ ಯೋಗ ದಿನಾಚರಣೆಗೆ ಹಸಿರು ನಿಶಾನೆ ತೋರಿಸುತ್ತದೆ, ಪಂಚಾಂಗಗಳ ಪ್ರಕಾರ ಈ ದಿನವೇ ಶಿವನು ಯೋಗವನ್ನು ಹೇಳಿಕೊಡುವ ಪ್ರಕ್ರಿಯೆ ಶುರು ಮಾಡಿದ ಎಂಬ ಪ್ರತೀತಿ ಇದೆ,ಉತ್ತರಾಯಣ ಕಳೆದು ದಕ್ಷಿಣಾಯನದೆಡೆಗೆ ಸಾಗುವ ಈ ಸಮಯ ಯೋಗ ಸಾಧನೆ ಶುರು ಮಾಡುವವರಿಗೆ ಸೂಕ್ತ  ಸಮಯ,ವರ್ಷದ ಇತರ ದಿನಗಳಿಗೆ ಹೋಲಿಸಿದರೆ ಜೂನ್ ೨೧ರಂದು ಧೀರ್ಘ ಕಾಲ ಹಗಲಿರುತ್ತದೆ ಹಾಗೂ ಅಲ್ಪ ಕಾಲ ಇರುಳಿರುತ್ತದೆ, ಇಷ್ಟೆಲ್ಲಾ ಪ್ರಾಮುಖ್ಯವಿರುವ ಕಾರಣ ಜೂನ್ ೨೧ ರಂದು ಅಂತರರಾಷ್ಟ್ರೀಯ ಯೋಗ ದಿನವನ್ನಾಗಿ ಆಚರಿಸಲಾಗುತ್ತದೆ. 

 

ನಿರಂತರವಾಗಿ ಯೋಗ ಸಾಧನೆಯಲ್ಲಿ ತೊಡಗಿಸಿಕೊಂಡಿದ್ದ ಋಷಿ-ಮುನಿಗಳು ಆರೋಗ್ಯವಂತರಾಗಿ ಹಲವಾರು ವರ್ಷಗಳ ಕಾಲ ಸಾರ್ಥಕ  ಜೀವನ ನೆಡೆಸಿದ್ದ ಎಷ್ಟೋ ಉದಾಹರಣೆಗಳು ಭರತ ಭೂಮಿಯಲ್ಲಿದೆ, ಮನಸ್ಸಿನ ಆಗ್ರಹದಂತೆ ದೇಹ ಯೋಗ ಸಾಧನೆಗೆ ಎಡೆ ಮಾಡಿಕೊಡುತ್ತದೆ,ಯೋಗ ಕಲಿಯುವಾಗ ಕಷ್ಟ ಎನಿಸುವ ಎಷ್ಟೋ ಆಸನಗಳು ಕೆಲ ಸಮಯದ ನಂತರ ಸರಾಗವೆನಿಸುತ್ತದೆ, ನಮ್ಮಲ್ಲಿ ಕಂಡು ಬರುವ ಬೆನ್ನು ನೋವು, ಕತ್ತು ನೋವು, ಏಕಾಗ್ರತೆಯ ಸಮಸ್ಯೆ, ಕೈ ಕಾಲು ನೋವು ಗಳಿಗೆ ಯೋಗದಿಂದ ಪರಿಹಾರವಿದೆ.ಏಕಾಗ್ರತೆ ಹೆಚ್ಚಿಸುವಲ್ಲಿ ವೃಕ್ಷಾಸನ ಅತ್ಯಂತ ಉಪಕಾರಿಯಾಗಿರುತ್ತದೆ,ಈ ಯೋಗಾಸನದ ಭಂಗಿಯಲ್ಲಿ ಒಂದೇ ಕಾಲಿನ ಬಲದೊಂದಿಗೆ ನಿಲ್ಲುವ ಯೋಗ ಪಟು ತನ್ನ ದೃಷ್ಟಿಯನ್ನು ನಿರ್ದಿಷ್ಟ ವಸ್ತುವಿನ ಮೇಲೆ ಇರಿಸಬೇಕಾಗುತ್ತದೆ,ಇಲ್ಲವಾದಲ್ಲಿ ಹೆಚ್ಚು ಕಾಲ ನಿಲ್ಲಲು  ಸಾಧ್ಯವಾಗುವುದಿಲ್ಲ,ಹೀಗೆ ವೃಕ್ಷಾಸನ ಮಾಡುವ ಮೂಲಕ ಏಕಾಗ್ರತೆ ಹೆಚ್ಚಾಗುತ್ತದೆ.ಎರಡು ಕಾಲುಗಳ ಮೇಲೆ ಸಂಪೂರ್ಣವಾಗಿ ಬಲ ಬಿಟ್ಟು, ದೃಷ್ಟಿಯನ್ನು ಒಳಮುಖ ಮಾಡುವ ಆಸನವೇ ಅಧೋಮುಖ ಶ್ವಾನಾಸನ, ಈ ಆಸನದಿಂದ ಬೆನ್ನು ನೋವು ನಿವಾರಣೆ ಆಗುತ್ತದೆ,ಬೆನ್ನು ಹಾಗೂ ಕೈಗಳನ್ನು ನೆಲದೆಡೆ ಬಾಗಿಸಿ ಮಡಿಚಿಚಿದ ಕಾಲುಗಳ ಮೇಲೆ ವಿಶ್ರಾಂತಿ ಪಡೆಯುವ ಆಸನವೇ   ಶಶಾಂಕಾಸನ,ದೇಹದಲ್ಲಿ ನೋವು ಕಾಣಿಸಿಕೊಂಡಿದ್ದಾಗ ಈ ಆಸನ ಮಾಡಿದರೆ ದೇಹ ಸಡಿಲವಾಗುತ್ತದೆ ಹಾಗೂ ಎಲ್ಲ ಭಾಗಗಳಿಗೂ ವಿಶ್ರಾಂತಿ ದೊರೆಯುತ್ತದೆ,ಹೀಗೆ ಒಂದೊಂದು ಆಸನಕ್ಕೂ ತನ್ನದೇ ಆದ ವಿಶೇಷತೆಗಳಿರುತ್ತದೆ, ಪೂರಕ(ಉಸಿರನ್ನು ಒಳಗೆ ತೆಗೆದುಕೊಳ್ಳುವುದು), ರೇಚಕ(ಉಸಿರನ್ನು ಹೊರಗೆ ಬಿಡುವುದು), ಪ್ರತಿ ಆಸನ ಮಾಡುವಾಗಲೂ ಪೂರಕ ಹಾಗೂ ರೇಚಕಗಳ ಮೇಲೆ ನಿಗಾ ಇರಬೇಕು,ಆಗಿದ್ದಾಗ ಮಾತ್ರ ಯೋಗ ಯಶಸ್ವಿ ಆಗುತ್ತದೆ, ಪ್ರಾಣಾಯಾಮ ಮಾಡುವ ಮೂಲಕ ಉಸಿರಾಟದ ಸಮಸ್ಯೆಗಳು ನಿವಾರಣೆ ಆಗುತ್ತದೆ, ಒಂದು ಮೂಗಿನ ಒಳ್ಳೆಯಿಂದ ಉಸಿರನ್ನು ತೆಗೆದುಕೊಂಡು ಅದೇ ಒಳ್ಳೆಯಿಂದ ಉಸಿರು ಬಿಡುವುದು ಒಂದು ವಿಧಾನವಾದರೆ ಮೂಗಿನ ಒಂದು ಒಳ್ಳೆಯಿಂದ ಉಸಿರು ತೆಗೆಂದುಕೊಂಡು ಇನ್ನೊಂದು ಒಳ್ಳೆಯಿಂದ ಉಸಿರು ಬಿಡುವುದು ಇನ್ನೊಂದು ವಿಧಾನ,ಹೀಗೆ ಯೋಗ ಹಾಗೂ ಪ್ರಾಣಾಯಾಮ ಮಾಡುವ ಮೂಲಕ ಮನುಷ್ಯ ಆರೋಗ್ಯವಂತನಾಗಿ ಇರಬಲ್ಲ ಹಾಗೂ ಯೋಗ ಮಾಡುವಾಗ ಪ್ರಕೃತಿಯೊಂದಿಗೆ ಒಂದಾಗುವ ಅನನ್ಯ ಅನುಭವ ಪಡೆಯುವವನಾಗಬಲ್ಲ.     

ನಾಳೆ ಸೂರ್ಯನಿಂದ ಬರುವ ಮೊದಲ ಕಿರಣವನ್ನು ಓಂಕಾರದೊಂದಿಗೆ ಸ್ವಾಗತಿಸೋಣ, ಅಂತರರಾಷ್ಟ್ರೀಯ ಯೋಗ ದಿನಾಚರಣೆಯ ಶುಭಾಶಯಗಳು.